Mais parce qu’il est difficile, & peut estre impossible de prouuer que le mouuement fasse vn son, quand nulle oreille ne le peut ouyr, il suffit de monstrer quel doit estre le mouuement des chordes pour faire des sons que l’oreille puisse apperceuoir […] car puis que l’experience fait voir les retours des chordes se diminuent selon la proportion de 12 à 11; et que i'ay monstré que le 132 retour n'est que la cent milliesme partie de la premiere traction, & que l’on oyt assez clairement le son d’vne chorde l’espace de 2, ou 3 secondes minutes, quoy qu’elle soit touchée tres foiblement, & que la premiere traction ou impulsion ne soit que du quart d’vne ligne, il s’ensuit que les chordes font des sons fort sensibles, encore que leur mouuement soit bien tardif, car supposé que l’on oye lesdits sons tandis que la chorde tremble 132 fois, elle ne fera pas l’espace d’vn poulce dans le temps d’vne seconde minute […]