Encore que les Violes soient capables de toutes sortes de Musique, & que les exemples que i’ay donné pour le concert des Violons leur puissent seruir, neantmoins elles demandent des pieces plus tristes & plus graues, & dont la mesure soit plus longue & plus tardiues, de là vient qu’elles sont plus propres pour accompagner les voix. […] l’on peut ioüer toutes sortes de pieces non seulement à cinq parties, comme l’on fait ordinairement sur les Violons, mais à six, à sept, à douze, & à tout autant de parties que l’on veut; ce qui peut semblablement estre executé par tous les autres instrumens, qui ont assez d’estenduë. Mais il suffit de mettre icy le commencement d’vne Composition à six parties (1, 2), laquelle a deux Dessus, deux Basses, vne Taille & vne Haute-contre. […] il faut remarquer que les Anglois ioüent ordinairement leurs pieces vn ton plus bas que les François, afin d’en rendre l’harmonie plus douce & plus charmante, & consequemment que leur sixiesme chorde à vuide fait le C sol au lieu que la nostre fait le D re sol […]; d’où il s’en suit qu’ils marquent plusieurs b mols & diese, dont nous n’vsons pas ordinairement.