[…] ie veux dresser vne table, par le moyen de laquelle l’on cognoistra tout aussi tost combien les chordes de tous les instrumens d’vn concert font de retours, ou combien de fois elles battent l’air; & parce que chaque periode de la chorde comprend son allée & son retour, le nombre de battements d’air est deux fois plus grand que celuy de ses retours. Et parce que les concerts à plusieurs parties contiennent ordinairement l’estenduë de 2, 3 ou 4 Octaues, & que tous les instrumens pris ensemble peuuent s‘estendre iusques à 8 Octaues […] la table qui suit contient 8 colomnes, dont chacune a vne Octaue entiere.