[…] ton n’est autre chose qu’une distance d’une voix à vne autre par vne seco[n]de parfaite: laquelle se fait d’une ferme & non fainte esleuation, ou abaissement de voix: Co[m]me d’vt iusques à re, de re à mi en montant, oui de mi à re, de re à vt en deuallant. Demi ton est vne distance d’une voix à vne autre p[ar] vne seco[n]de imp[ar]faite, laquelle se fait d’une molle & fainte esleuation, ou abaissem[n]t de voix de mi à fa, ou de fa à mi, ou bien de la à fa en montant, & de fa à la en descendant quand il ne faut monter que d’un degré par dessus les six voix. Et il ne faut entendre iceluy estre appelé demi ton, co[m]me n’estant que la moitié d’un ton: Car vn ton (Co[m] dit Macrobe en son second liure Chap. j. sur le songe de Sçipion) selon sa nature ne peut estre diuisé en deux: & pourtant il est dit improprement demi ton pour ce qu’il ne se profere du tout si parfaitement qu’un ton.