Si nous n'avions l'exemple des anches qui nous font comprendre les mouuemens de la languette du larynx, que les Anatomistes appellent glotte, il seroit malaisé de sçavoir comment la voix d'vn homme peut auoir l'estenduë de 3 ou 4 Octaves, d'autant que la seule largeur de l'artere vocale et du larynx ne suffisent pas, comme l'on experimente aux tuyaux ordinaires des Orgues, qui ne peuuent estre assez élargis pour faire l'Octave, quoy qu'ils soient six ou sept fois plus larges ou plus estroits si quant & quant on ne les allonge; car l'experience enseigne que de plusieurs tuyaux de mesme hauteur celuy qui est deux fois plus large il ne descend que d'vn ton plus bas, & s'il est quatre fois plus large il ne descend que d'vne tierce majeure, comme i'ai remarqué au traicté des Orgues.