Et si ie voulois faire chanter ce vers hexametre François au mesme ton que ie le chante, lors que ie commence à vn ton plus haut d'vne Tierce maieure que le plus bas ton de ma voix, & que ie voulusse que les Chinois le chantassent au mesme ton que moy, il suffiroit qu'ils cogneussent que le ton de la premiere note vaut 50, parce que la chorde qui est à l'vnisson de ce ton tremble 50 fois dans vne seconde; c'est pourquoy 50 est le propre charactere, ou [p149] le propre nom de la premiere note de cet air, il n'y a point de mesure si propre pour mesurer le graue & l'aigu des sons, que les nombres par lesquels les Medecins peuuent remarquer le temperament ou la complexion des hommes aux differens tons de leurs voix, ou aux differens battemens de leur poux.