Busbeque Ambassadeur à Constantinople pour Ferdinand Roy des Romains, recite vne chose tres-remarquable sur ce sujet […] ayant recogneu que les chordes de ses Machines estoient trop longues d’vn poulce, les arrosa d’eau, laquelle les feist accourcir. Quant à la tension, l’on en peut iuger en deux façons, premierement par le son, car si la chorde d’vn instrument de musique monte plus haut d’vne Quarte, elle enseignera de combien sa tension s’est augmentée, c’est à dire que la tension de la chorde en temps humide sera à la tension de la mesme chorde en temps sec, comme 16 est à 9, car il faut que les tensions, & les forces qui font les tensions, soient doublées des simples raisons que gardent les interualles harmoniques.