La Trompette est l'vn des plus anciens instrumens de musique, comme il est aysé de conclure par celles qui seruoient aux Prestres des Iuifs [...] Mais on les fait ordinairement de laton, c'est à dire de cuiure meslé auec de la calamine, dont ie parleray dans le liure des Cloches; quoy que l'on puisse les faire de fer, d'estain, de bois, &c. Or le laton est tres propre pour cela, tant à raison de sa dureté & de sa fermeté, que de la facilité qu'il y a de le battre & de l'estendre à coups de marteau, & de ce qu'il dure tres longtemps, & qu'il couste fort peu à l'esgard de l'or & de l'argent, dont ceux-là peuuent se seruir pour faire des Trompettes, qui font faire des Luths de cette mesme matiere.