Si les sons montent à mesme proportion que les chordes des cloches, & que toutes les autres s’acourcissent en temps humide, ou en hyuer, il est facile de sçauoir combien les chordes des instrumens monteront, car si elles se racourcissent d’vne 8. partie, les instrumens auront monté d’vn ton maieur, d’autant que la chorde a 9 parties en temps sec, & n’en a que 8 en temps humide: il est facile d’adiouster plusieurs autres exemples. L’on peut donc conclure combien les chordes des instrumens s’acourcissent, si elles n’estoient detenuës par les cheuilles; par exemple, elles s’acourciroient d’vne quinziesme partie, quand elles montent d’vn semi ton maieur.