Quant au manche [de la lyre] & à ses cheuilles, on les fait de telle forme que l’on veut, aussi bien que la table & les autres parties; car il n’importe nullemét pourueu que la Lyre & les autres instrumens ayent vne bonne harmonie. Or i’explique seulement icy deux choses de la Lyre, dont l’vne est commune à la Viole, au Luth, à l’Epinette, au Monochorde, & à tous les autres instrumens, à sçauoir pourquoy la mesme chorde estant touchée fait l’Octaue, & la Douziesme, en haut outre son ton naturel; & l’autre luy est particuliere, à sçauoir son accord, qui consiste principalement aux dix premieres chordes, qui vont tousiours de quinte en quarte, car l’on descend tousiours d’vne Quarte apres auoir monté d’vne Quinte; de sorte qu’elles ne font iamais l’Octaue à vuide, & que l’on trouue quatre tons maieurs tout de suite, que font la 2, 4, 6, & 8, ou la 3, 5, 7, & 9. chorde: d’où il s’ensuit que la 9 fait le Triton maieur auec la 3, la 7 auec la I, la 2 avec la 8, & la 4 auec la I0, & consequemment la I0 auec la 2, & la 9 auec la I font le Quadriton maieur.