Ie sçay que l'on peut aduertir au commencement de la piece de Musique qu'elle doit estre chantée au ton de Chapelle, ou plus haut ou plus bas d'vn demy ton, &c. Mais plusieurs ne sçauent que c'est le ton de Chapelle, & il est trop difficile de transporter vn tuyau d'Orgue, ou quelqu'autre instrument, & bien qu'on l'enuoyast en telle façon qu'il ne perdist nullement sa forme, il parleroit plus haut ou plus bas selon le vent que l'on luy peut donner, & consequemment l'on n'auroit pas vne entiere certitude du graue & de l'aigu du son. Or le Compositeur donnera vn signe certain & uniuersel du ton, auquel il desire que l'on chante sa Musique, ou telle autre qu'il voudra, s'il met vis à vis de l'vne des notes de la Basse, ou des autres parties, le no[m]bre des battemens de l'air qui fait le son; par exemple, s'il met 96 vis à vis de la premiere note de l'air du Sieur Boësset […] tous ceux qui sçauront la nature du son, ou la maniere dont il se fait, chanteront la Musique, proposée selon son intention, ou celle de quelqu’autre Compositeur, & chaque partie prendra le ton suiuant leur desir.