PROPOSITION XXXV
Determiner quels sont les vices & les imperfections de la voix; & si l'on peut faire chanter la Musique à une voix mauvaise & inflexible.
[…] [p44] Iosquin a fait voir qu'vne voix inflexible & mauuaise peut chanter sa partie, car ayant promis à Louys XII, dont il estoit Musicien, de luy faire chanter sa partie, quoy qu'il eust la voix discordante, & très–mauuaise, il fit une composition à quatre parties, & fit aduoüer au Roy qu'il pouuoit chanter en Musique. Il faut néanmoins remarquer qu'il est necessaire que la voix tienne ferme sur un ton ou sur une chorde, & qu'elle soit constante; car si elle varie tellement qu'elle n'ait nul arrest, il n'est pas possible qu'elle chante sa partie quoy qu'vniforme, si ce n'est qu'en variant elle face [sic] de certains tons dont on puisse remarquer les differences, & que cette veriété garde quelque sorte d'vniformité […]Ie donne donc la piece de Musique dont i'ay parlé, afin de ioindre l'exemple au discours. (Fig. II, 1, 32, p45) . Or il n’y a voix si mauuaise qu’elle ne puisse chanter cette Taille; car si elle est entierement inflexible, elle ne peut manquer à tenir ferme; & si l’on a peur qu’elle ne tienne pas ferme, & qu’en haussant ou baissant elle fasse des Dissonances, l’on peut faire souuvent sonner vn tuyau d’ orgue pour la contraindre à tenir le mesme ton. L’on peut faire chanter le Dessus ou la Basse à la mesme voix, suiuant le ton qu’elle a: mais parce que la voix du Roy estoit propre pour le Tenor, Iosquin luy donna cette partie [.;]