[…] ces sept Quintes font la Vingt-neusiesme [sic], c’est à dire quatre Octaues, de sorte que les Violons ont autant d’estenduë que le clauier des Epinettes & des orgues. Quant à l’estenduë de chaque partie, elle est de quatre quintes qui font la Dix-sesptiesme maieure, car outre les trois Quintes qu’elle fait à vuide, elle monte encore d’vne quinte par le moyen du manche que l’on touche. Et les excellens Violons qui maistrisent cet instrument peuuent faire monter chaque chorde iusuqes à l’Octaue par le moyen du manche, sur lequel ils treuuét 144 demy-tons pour transposer les 12 modes en tel lieu, & à tel ton qu’ils veulent. Or les 2 figures precedentes suffisent pour faire co[m]prendre celles des autres parties, qui ne different que de grandeur, com[m]e il arriue aux autres instrumens, dont les plus grand esbranlent vne grande quantité d’air, & font des sons plus graues & plus profonds.