[...] pour parler comme il faut de l’Epinette, nous deuons considerer sa matiere, sa figure, ses parties, ses cordes, ses sons, son harmonie & son vsage tant ez (sic) concerts, que lors qu’elle est consideree toute seule, ce que nous ferons succinctement, & la plus clairement qu’il nous sera possible.
Quant à la Matiere, il faut considerer trois choses aux instrumens à chordes, & comme les anatomistes diuisent le corps humain en la teste, au thorax & aux membres, dont la teste est le siege de la raison, & le domicile des sens, & le thorax est le lieu des parties vitales, aussi peut-on diuiser toute sorte d’instrumens de musique en corps, en table & en manche, comme font les ouuriers.