L’autre chose qui arriue aux chordes, consiste en la tension, qui les fait monter plus haut sur de certaines Violes que sur les autres, encore qu’elles soient toutes de mesme longueur, & qu’il y ayt vne esgale distance de leurs cheualets à leurs fillets: car il y a des Violes sur lesquelles on rompt vingt ou trente chanterelles, auant que d’en pouuoir trouuer vne qui monte assez haut; & d’autres que lesquelles toutes sortes de chanterelles montent aysément, dont les Facteurs d’instrumens ne donnent point d’autre raison, que la dureté & la force de la table qui rompt les chordes, au lieu qu’elle les conserue lors qu’elle est moins forte, & qu’elle tremble & fremit plus aysément.