[…] il me souvint qu’entre les papiers rejectez et brouillez, que j’ay recueillez aultreffois soubz maistre Thoinot arbeau demeurant à Lengres, mon premier maistre, il y avoit certains discours qui parlent du tambour, que je proposay deslors vous envoyer si tost que je serois de retour audict Lengres. Est advenu que les feuilletant de plus prez, j’ay treuvé qu’ilz parlent principallement des dances, et accessoirement du tambour.

J’ay deffault de la dance pour complaire aux damoiselles, desquelles il me semble que depend toute la reputation d’un jeusne homme à marier.

Les dances sont practiquées pour cognoistre si les amoureux sont sains et dispos de leurs membres, […] elle[s] se treuve[nt] necessaire[s] pour bien ordonner une societé.

J’ay leu que Ciceron fit reproche a Gabinius consulaire qu’il avoit dancé. Tiberius chassa de Romme les danceurs. Domitian osta du nombre des senateurs, aulcuns qui avoient dancé. Alphonse roy d’arragon blasmoit les gaulois parce qu’il les voioit delecter aux dances. Le Sainct prophete Moyse se courrouça voyant dancer les enfans d’Israel.

Les indes saluent le soleil en dançant, Et ceulx qui ont voyagé ez terres neufves rapportent que les sauvages dancent quant ilz aperçoivent le soleil se monstrer sur l’orizon. Socrates apprint a dancer de Aspasia. Les saliens tresnobles prebstres de Mars dançoient en leurs sacrifices. Les choribantes en frigie. Les lacedemoniens et ceux de Crete n’alloient a l’assault contre leurs ennemis sinon en dançant. Vulcan grava sur une targue une dance comme chose tresbelle a veoir. Museus et Orpheus, voulurent que leurs hymnes qu’ilz avoient composées en l’honneur des dieux, fussent chantées avec dances.

Pollux et Castor, aprindrent les Cariens à dancer. Neoptolemus filz d’Achiles enseigna une dance appellée la pirrichie a ceulx de crete pour s’en aider en la guerre. Epaminundas en usoit fort dextrement, au choq d’une bataille, affin que tous ensemble marchassent contre l’ennemy. Xenophon rapporte que lon fit dances et mascarades pour recepvoir les capitaines de Cirus.

Il me souvient que le poëte mect les danceurs entre les bien heureux, disant en son sixieme des Æneides, Pars pedibus plaudunt choreas et carmina dicunt.